Nova CEESG
Xornadas de xestión cultural: Dalle xeito
O alumnado de Educación Social da Universidade de Santiago organiza as Xornadas de experiencias culturais Dalle Xeito, nas que se pretende dar a coñecer experiencias prácticas de proxectos de participación e sociocultura; favorecer o coñecemento de ferramentas e metodoloxías para a acción educativa no ámbito da sociocultura; poñer en valor a cultura propia como elemento identitario, e promover a reflexión sobre o perfil profesional do/a Educador/a Social no quefacer cultural. Contan, entre outras, coa colaboración do Ceesg.
As xornadas desenvolveranse os días 21, 23 e 28 de novembro.
O luns 21 comeza a actividade na Facultade de Ciencias da Educación (Campus Vida) coa presentación do nº 82 da Revista Galega de Educación, o monográfico que leva por título ‘Cultura, territorio e socioeducación’ e que foi coordinado por integrantes do grupo de traballo sobre Animación Sociocultural e Xestión Cultural do Ceesg. Intervirán no acto, ademais de varios compoñentes do citado grupo, a autora dun dos artigos publicados na revista e a vicepresidenta do Ceesg.
Continúa o mércores día 23 na Facultade de Psicoloxía (aula 7 (XV Viqueira, módulo B), con mesas redondas nas que se presentarán diferentes experiencias culturais vinculadas á socioeducación, e que poñen o foco na música como ferramenta socioeducativa e intercultural e na participación cidadá dende fóra do sistema.
Para finalizar, o luns 28 de novembro, na contorna do Museo do Pobo Galego, poñerase de relevo a cultura popular e tradicional como elemento chave para a formación da identidade, contando para este peche con pasarrúas de música e baile, artesanía, xogos populares, tradición oral…
A participación nas xornadas é de balde con inscrición previa.
Quizais che interese
Outras novas
Estas son as ofertas de emprego máis recentes publicadas na web do Ceesg:
- Educador/a social
- Educador/a social
- Operador/a teleasistencia
- Educador/a social
Se estás á procura desemprego, recorda visitar regularmente a nosa web para estar ao tanto de todas as novidades.
O vindeiro mércores 29 de marzo teremos unha nova presentación do libro ‘A Educación Social’ de Os Bolechas.
Volvemos a Compostela, onde nos acollerá a Facultade de Ciencias da Educación (Campus Vida).
O libro-guía ‘A Educación Social’ de Os Bolechas é unha ferramenta que visibiliza a profesión, que a explica, que fala da súa importancia e do seu impacto social nunha linguaxe que as nenas e nenos poden comprender.
Non perdas a oportunidade de facerte cun dos exemplares desta edición limitada dos Bolechas que podes reservar na páxina web do Ceesg.
Mércores 29 de marzo ás 10:30 na aula 6-7 (módulo A).
O pasado sábado 25 de marzo tivo lugar a Asemblea do Ceesg.
As propostas levadas á asemblea foron aprobadas (acta da asemblea anterior, memorias económica e de actividades, orzamento e plans de traballo, e propostas económicas) Toda a documentación segue estando dispoñible para consulta na web do Ceesg, e pronto se actualizará a información xeral coas propostas económicas aprobadas, é dicir, a conxelación de cotas de mantemento colexial para o ano 2023, o cobro de cota por emisión de certificados a persoas non colexiadas, e redución de cota de alta para persoas tituladas recentes.
Previa á asemblea, tivo lugar unha formación na que puidemos reflexionar sobre o papel das educadoras e educadores sociais no acompañamento socioeducativo, e tamén se presentou o libro ‘A Educación Social’ de Os Bolechas, así como unha guía didáctica para o uso deste, que nos achega ideas de traballo coas crianzas para que coñezan a profesión e os seus contextos.
Nas nosas redes sociais podedes ver algunhas fotografías da xornada.
Grazas a todas as persoas que asistiron e participaron na Asemblea.