Nova CEESG

Novidades do VIII Congreso Estatal de Educación Social

11 - 03 - 2021

O Congreso Estatal de Educación Social é o evento de maior relevancia en torno á Educación Social. Os Congresos Estatais serven para tomar o pulso da Educación Social e tamén son o espazo para fixar obxectivos prioritarios da profesión, sendo en moitas ocasións o lugar onde se aproban documentos fundamentais e onde se debate sobre o noso futuro inmediato.
A 8ª edición do congreso da nosa profesión, prevista para abril de 2020, tivo que adiarse debido á pandemia.
Amoldándose á nova situación, adaptouse a metodoloxía para ofrecer un congreso totalmente en liña, de xeito que a inscrición permite asistir en directo ao congreso e o visionado en diferido. As novas datas quedaron fixadas para a semana do 20 ao 25 de setembro, anunciándose algunhas novidades:

  • Os obradoiros impartiranse en liña entre os días 20 e 22. A inscrición dá dereito a participar nun deles (podendo interactuar co/a relator/a), mais poderán visionar todos os demais en streaming ou en diferido.
  • Hai actualizacións no programa, mantendo, entre outras, a participación de Manuela Carmena no relatorio inaugural, Federico Mayor Zaragoza no relatorio principal e José Antonio Caride Gómez no relatorio de peche.
  • Abriuse un prazo extraordinario para achegar contribucións, ata o 15 de abril: comunicacións, pósteres ou experiencias (as aceptadas provisionalmente con anterioridade seguen sendo válidas).
  • Simplificáronse as tarifas (ver información detallada)
  • A presencialidade poderá ser posible na medida en que as restricións sanitarias o permitan (quen queira optar a asistir presencialmente debe indicalo na inscrición)
  • Novo emprazamento: Centro Etopia, axeitado para o aforo previsto e os medios tecnolóxicos necesarios.
  • Nova páxina web máis accesible, onde se irán engadindo todas as novidades do Congreso.

O lema do congreso pretende integrar catro conceptos que se consideraron prioritarios: Compromiso, Dereitos, Transformación e Dignidade, concretándose en ‘Educación Social, dignidade e dereitos’. Tras os acontecementos recentes, considerouse necesario incorporar unha mirada transversal feita desde o que a experiencia, persoal, profesional, social, etc. nos fixo vivir nestes tempos de pandemia e en como podemos dar respostas a eses interrogantes. Así, o lema toma un novo matiz: ‘Educación Social, dignidade e dereitos en tempo de pandemia’

Proximamente abrirase o prazo de inscricións

www.congresoeducacionsocial.org

Quizais che interese

Outras novas

Convocatoria prazas Deputación da Coruña
Convocatoria prazas Deputación da Coruña

A Deputación da Coruña publicou recentemente a convocatoria para a contratación de 12 prazas de ‘Educador/a infantil’ (BOP do 12/03/2021)

Xa en varias ocasións o Ceesg ten reclamado a adaptación da RPT e dos equipos educativos nos centros de atención á infancia titularidade da Deputación da Coruña (e máis concretamente no caso do Fogar Emilio Romay), tendo constatado que tanto as titulacións esixidas como a propia composición dos equipos non se axustan á realidade académica nin ao que se pode considerar axeitado para unha atención de calidade.

A Educación Social é unha profesión definida, cun corpo formativo consolidado e ofertado pola maioría das universidades españolas, polo que non ten sentido que continúen dándose situacións coma esta, nas que equipos profesionais que se supón deberían ser especializados teñen unha composición inadecuada e academicamente insuficiente.

Afondando na convocatoria citada anteriormente, chama poderosamente a atención que tratándose dun posto de ‘Educador/a infantil’ (recordemos que a Educación infantil esténdese dos 0 aos 6 anos) o temario alude ao tramo de idade 0-12.

As administracións públicas, neste caso a Deputación da Coruña, deben garantir que as e os menores sexan atendidos do xeito máis adecuado, por iso, o Ceesg vén de interpoñer recurso de reposición á convocatoria para a súa rectificación.

Convenio entre o Ceesg e EspazoCoop
Convenio entre o Ceesg e EspazoCoop

A Unión de Cooperativas EspazoCoop e o Ceesg asinaron recentemente un convenio co propósito de colaborar en iniciativas e proxectos que fomenten o emprego e o autoemprego e en especial que promovan o desenvolvemento de proxectos empresariais baixo a fórmula de cooperativa.

A través do mesmo, EspazoCoop comprométese a realizar actividades de información, asesoramento e formación en dita materia, e a atender ás persoas que soliciten orientación sobre a fórmula empresarial cooperativa.

Por parte do Ceesg, o compromiso que adquire, entre outros, é o de poñer en valor e visibilizar a fórmula de cooperativa de traballo, tendo como referente a EspazoCoop nesta materia e de cara a reforzar procesos formativos sobre a mesma.

Calquera tipo de actividade profesional pode organizarse mediante o réxime cooperativo, son empresas participativas, democráticas e autoxestionadas, están moi en consonancia con valores que a sociedade actual reclama e estima para os contornas de traballo. As empresas cooperativas son o máximo expoñente do sector da Economía Social, sendo xeradoras de emprego en tempos de crise.

Para coñecer un pouco máis EspazoCoop podes consultar a súa web ou o seu último boletín.

Formación Ceesg: ‘TENDENDO PONTES’ Atención á xuventude, mulleres e homes inmigrantes en saúde sexual
Formación Ceesg: ‘TENDENDO PONTES’ Atención á xuventude, mulleres e homes inmigrantes en saúde sexual

O grupo de traballo Fiadeiras do Ceesg, en colaboración coa Federación de Planificación Familiar Estatal (FPFE), ofrece unha serie de obradoiros gratuítos en liña sobre sexualidade e xénero, dirixidos a persoas colexiadas do Ceesg ou doutros colexios profesionais pertencentes ao CGCEES, así como a estudantes amigas/os do Ceesg e figuras similares doutros colexios.

Os vindeiros días 15, 16 e 22 de abril terá lugar o curso ‘TENDENDO PONTES’ Atención á xuventude, mulleres e homes inmigrantes en saúde sexual.

Xa está aberto o prazo de inscrición.

Ver información detallada e formulario de incricións