Nova CEESG

O Ceesg recorda a inaceptable situación da profesión de Educación Social na Xunta de Galicia, con motivo da celebración dos exames de oposición de ‘Educadoras/es’

25 - 03 - 2021

    O Colexio de Educadoras e Educadores Sociais de Galicia (Ceesg) recorda que é necesario revisar a Lei de Emprego Público para regularizar a situación da profesión de Educador/a social.

    Os exames da anterior OPE tiveron lugar no ano 2007. Despois de catorce anos, non só non se emendou a situación, senón que se danou aínda máis.

Este sábado terá lugar o exame de oposición para os postos de ‘Educador/a’ da Xunta de Galicia, dos que se convocan 86 postos (ofertas de emprego público dos anos 2017 e 2018), e aos que aspiran 1965 persoas, entre a quenda de acceso libre e a de promoción interna.
Con ocasión da celebración deste exame, o Colexio de Educadoras e Educadores Sociais de Galicia (Ceesg) reitera o agravio e perda de calidade que supón esta convocatoria, ao admitir titulacións distintas ao título universitario de Educación Social. Agravio porque as demais titulacións admitidas xa teñen unha categoría propia, á que como é lóxico, só se pode acceder con esas titulacións concretas, e perda de calidade dos servizos socioeducativos porque non se garante a formación específica do persoal nin a interdisciplinariedade que debe caracterizar os equipos profesionais.
Tanto a Dirección Xeral de Función Pública coma as organizacións sindicais fixeron caso omiso das peticións do Ceesg, desoíndo todas as alegacións presentadas no seu momento aos diferentes borradores da convocatoria, formuladas tamén en xuntanzas presenciais.
A Xunta de Galicia debería velar por ofrecer á cidadanía unha atención especializada, así como respectar os dereitos das persoas que investiron esforzo, tempo e cartos nunha formación universitaria oficial, recoñecida pola administración pública. A día de hoxe, máis de 4000 persoas tituladas en Educación Social en Galicia.
A Lei de Emprego Público de Galicia, que ampara esta situación, debe ser modificada para poñer fin a esta situación dunha vez por todas, algo que o Ceesg seguirá reivindicando por todos os medios ante a Dirección Xeral de Función Pública e sindicatos, nas sucesivas ofertas de emprego público e convocatorias que poidan producirse.

Colexio de Educadoras e Educadores Sociais de Galicia

Quizais che interese

Outras novas

Súmate á campaña do CGCEES para visibilizar a loita contra o Acoso Escolar
Súmate á campaña do CGCEES para visibilizar a loita contra o Acoso Escolar

A Comisión de Educación Social no Sistema Educativo do CGCEES convídate a participar na campaña do Día Internacional contra o Acoso Escolar (2 de maio).
A idea é moi sinxela: faite unha foto coa mensaxe #Yotambiénconstruyoconvivencia e envíalla a través deste Formulario
Tes ata o 25 de abril de 2021 (ata as 22.00 h.) para facer chegar a imaxe e a mensaxe, e axudarnos a visibilizar o traballo das Educadoras e os Educadores Sociais a favor da convivencia nos centros escolares.
A mellor forma de combater e erradicar o acoso escolar é a construción de convivencia no sistema educativo.

COMO PARTICIPAR:

Faite a foto no lugar desde o que constrúes convivencia.
O fío condutor é o sistema educativo e toda a súa contorna: ANPAS, colexios, institutos, asociacións, fundacións, ONG que desenvolvan programas en centros educativos, investigadoras/é, formadoras/é do profesorado, estudantes con interese en formar parte do sistema educativo, pais, nais e demais persoas que formen parte da comunidade educativa, coa mirada ampla que a educación para a convivencia implica.
Incluír na imaxe a mensaxe #Yotambienconstruyoconvivencia (en calquera dos idiomas oficiais do Estado, ou no que uses para construír convivencia).
Ser o máis orixinal posible, ou o máis sinxela, ou o máis auténtica, ou o máis ti. Iso si, debe ser unha foto túa, que queiras que forme parte da campaña, libre de dereitos de autor/a e autorizada nos termos que se inclúen no formulario.
Evidentemente, buscamos que as fotos as protagonicen Educadoras e Educadores sociais: somos a alma desta campaña!
Axúdanos a visibilizar a mensaxe a Educación Social É convivencia!

Formación Ceesg: FAGAMOS UN BO TRATO. Prevención sobre situacións de xénero e violencia sexual no contexto do consumo de drogas na mocidade
Formación Ceesg: FAGAMOS UN BO TRATO. Prevención sobre situacións de xénero e violencia sexual no contexto do consumo de drogas na mocidade

O grupo de traballo Fiadeiras do Ceesg, en colaboración coa Federación de Planificación Familiar Estatal (FPFE), ofrece unha serie de obradoiros gratuítos en liña sobre sexualidade e xénero, dirixidos a persoas colexiadas do Ceesg ou doutros colexios profesionais pertencentes ao CGCEES, así como a estudantes amigas/os do Ceesg e figuras similares doutros colexios.
O terceiro dos cursos que se ofrece é ‘FAGAMOS UN BO TRATO. Prevención sobre situacións de xénero e violencia sexual no contexto do consumo de drogas na mocidade’.

Datas: 26, 27 e 28 de abril.
Horario: de 17:00 a 19:00 h.

Xa está aberto o prazo de inscrición.

Ver información detallada e formulario de incricións

Novas ofertas de emprego
Novas ofertas de emprego

Estas son as ofertas de emprego máis recentes publicadas na web do Ceesg:

  • Educador/a social
  • T. de infraestruturas culturais
  • Monitor/a de tempo libre
  • Axente de emprego e desenvolvemento local

Se estás á procura de emprego, recorda visitar regularmente a nosa web para estar ao tanto de todas as novidades.