Nova CEESG

Manifesto día da educación social 2021

29 - 09 - 2021

No #edusoday2021 queremos facer visible a importancia que para a sociedade Ourensá ten a educación social. No ano 1991 botou a andar a Diplomatura en Educación Social no sistema universitario español. Xurdiu da resposta á necesidade de creación dunha figura profesional especializada no acompañamento socioeducativo. Ata ese momento foron profesionais con formacións moi diversas quenes foron atendendo unha demanda social que cos anos se fixo máis intensa. No ano 1995 empezou a impartirse no Campus de Ourense a Diplomatura en Educación Social. Na actualidade continúa sendo un grao. Nestes anos formáronse en Ourense unhas 1600 figuras profesionais da educación social. Actualmente contamos con profesionais especializadas en Concellos, Recursos de Protección á Infancia, Centros de Atención a Persoas Maiores, Programas de apoio a persoas en dificultade social etc.

As educadoras e educadores sociais estamos acompañando ás persoas máis vulnerables, fomentando procesos de empoderamento e facilitando espazos de seguridade persoal dende os que superar a situación de dificultade social. A ilusión e a implicación profesional posibilitou a elaboración de complexas estratexias de intervención socioeducativa. Actualmente a educación social conta con un rico corpo teórico dende o que poder afrontar as complexas realidades nas que traballamos. Aeducación social transitou da improvisación dos anos 90 a contar no día de hoxe con unha base de coñecemento científico que favorece a eficacia nas intervencións.

Nas últimas décadas, os avances na práctica profesional en educación social foron significativas, pero non todas as administracións son conscientes da importancia de contar con persoal con coñecementos especializados. Denunciamos que o Concello de Ourense está a publicar convocatorias de acceso a postos específicos da educación social nos que que dispor da Diplomatura e/ou o Grao en educación social non é un requisito. Por este motivo, preguntámonos si o Alcalde de Ourense coñece as consecuencias que ten para as persoas vulnerables ser acompañadas por persoal non especializado. Non entendemos como nunha cidade na que se forman Educadores/as sociais o concello non valore a calidade das ensinanzas impartidas no campus de Ourense. Actualmente está fomentando o intrusismo laboral, amosando un descoñecemento absoluto dos contextos de intervención socioeducativa. A situación vese agravada polas consecuencias da pandemia que estamos a vivir. O Concello de Ourense precisa activar recursos de acompañamento socioeducativo que apoien a colectivos en dificultade e
posibiliten a familias e a adolescentes contar con apoio especializado. Solicitamos que o Concello de Ourense active convocatorias de persoal nas que se esixa coñecemento especializado para o acceso ao posto de educador/a social.

O sentido común di que queremos uns servizos públicos eficaces que garantan o dereito da cidadanía á educación social. Tendo a profesionais especializados como é posible que se renuncie a esa especialización e se pretenda contratar a persoas sen os coñecementos precisos?.

Por unha sociedade máis equitativa e xusta. Por moita educación social en Ourense e en Galicia.

Feliz #DIES2021 #edusoday2021

Grazas.

Quizais che interese

Outras novas

IX Invernada de cine de Cabreiros
IX Invernada de cine de Cabreiros

Un ano máis o Ceesg colabora coa Invernada de Cine de Cabreiros, que vai xa pola súa IX edición. Unha iniciativa de carácter cultural promovida pola asociación de veciños desta parroquia xermadesa e a Universidade de Santiago, coa colaboración do Ceesg e financiamento da Deputación de Lugo e o Concello de Xermade.

O Colexio de Educadores e Educadoras Sociais de Galicia encargarase da presentación doa primeira das proxeccións, o vindeiro 23 de outubro. ‘A poeta analfabeta’, baixo a dirección de Sonia Méndez, é o documental que inaugurará a invernada, cunha temática que nos achega á figura de Luz Fandiño, poeta e activista compostelá, nacionalista e feminista que se viu na obriga de emigrar na época franquista pero nunca perdeu de vista Galicia, onde retornou anos máis tarde, rematada a ditadura.

A IX Invernada de Cine de Cabreiros estrutúrase en 6 sesións que se desenvolverán entre o 23 de outubro e o 18 de decembro e que inclúen non só proxeccións audiovisuais, senón tamén outras actividades como un espectáculo de maxia, un monólogo, unha peza teatral e a presentación dun libro.

O aforo está limitado, polo que é necesario anotarse previamente chamando ao 686 104 780 ou 606 282 251.

Máis información no seu perfil de facebook

Novas ofertas de emprego
Novas ofertas de emprego

Estas son as ofertas de emprego máis recentes publicadas na web do Ceesg:

  • Educador/a social
  • Persoal directivo e docente obradoiro dual de emprego
  • Persoal directivo e docente obradoiro dual de emprego
  • Técnica/o de intervención familiar

Se estás á procura de emprego, recorda visitar regularmente a nosa web para estar ao tanto de todas as novidades.

Reclámase unha rede de recursos terapéuticos con profesionais especializadas/os para persoas cunha demencia neurodexenerativa
Reclámase unha rede de recursos terapéuticos con profesionais especializadas/os para persoas cunha demencia neurodexenerativa

A Federación Alzhéimer Galicia xunto cos colexios profesionais de educación social (CEESG), fisioterapeutas (COFIGA), psicoloxía (COPG), terapia ocupacional (COTOGA) e traballo social (COTSG) manifestan a súa preocupación pola falta de recursos terapéuticos desenvolvidos por equipos de profesionais especializados na atención ás demencias neurodexenerativas.

Os avances sociais e sanitarios producidos na sociedade galega durante as últimas décadas veñen de transformar o perfil e as necesidades das persoas maiores da nosa comunidade, que precisan novos xeitos de intervención.

A importancia dun envellecemento activo e saudable que sirva para previr e detectar de xeito precoz as demencias neurodexenerativas ten que transformarse nun piar dos servizos de atención sociosanitaria en Galicia e atender esta realidade en todo o proceso que vai dende a prevención ata a intervención terapéutica.

Neste sentido as Casas do Maior son unha ferramenta de apoio comunitaria das persoas maiores, sobre todo na loita contra a soidade non desexada, pero carecen de carácter terapéutico e non garanten unha atención integral e interdisciplinar.

Así mesmo, ante a alta prevalencia das demencias neurodexenerativas en persoas maiores e a intensa campaña que se está a realizar a favor do envellecemento activo e detección precoz, urxe o desenvolvemento de recursos especializados de atención a persoas con deterioro cognitivo leve en todo o territorio rural de Galicia.

É preciso achegar os recursos de promoción e prevención, que están dentro da carteira de servizos de atención a dependencia, ao contorno rural, establecendo puntos de atención á cidadanía nos distintos concellos de Galicia

Estes recursos ofrecen, mediante a intervención de profesionais especializadas/os en atención ás demencias, unha serie de servizos para as persoas afectadas e as súas familias, ademais de enriquecer o contorno social onde leven a cabo e axudar a fixar poboación.